عێراق: 35 کۆمپانیای جیهانی رکابه‌ری ده‌که‌ن بۆ دروستکردنی یه‌ک ملیۆن یه‌که‌ی نیشته‌جێبون

15 Aug 2010 - نووسه‌ر: - abdullah بینراو: - 9

ده‌سته‌ی وه‌به‌رهێنانی عێراق 35 کۆمپانیای بیانی له‌کۆی 117 کۆمپانیا هه‌ڵبژارد به‌ مه‌به‌ستی دروستکردنی یه‌ک ملیۆن یه‌که‌ی نیشته‌جێبون له‌سه‌رتاسه‌ری عێراقدا. سامی ئه‌عره‌جی، سه‌رۆکی ده‌سته‌ی وه‌به‌رهێنانی عێراق رایگه‌یاند: پرۆژه‌ی دروستکردنی یه‌ک ملیۆن یه‌که‌ی نیشته‌جێبون له‌ عێراقدا قۆناغێکی باشی بڕیوه‌و بۆ ئه‌و مه‌به‌سته‌ 35 کۆمپانیا هه‌ڵبژێردراون، که‌ ژماره‌یه‌ک کۆمپانیای جیهانی وڵاتانی ئه‌مه‌ریکی و ئیسپانی و تورکی و ئه‌ڵمانی و فه‌ره‌نسی و که‌نه‌دی و چه‌ند وڵاتێکی دیکه‌ له‌خۆده‌گرێت. ئه‌عره‌جی له‌لێدوانێکیدا بۆ (بابنیوز) وتیشی: پرۆژه‌که‌ سه‌رتاسه‌ری وڵات ده‌گرێته‌وه‌و له‌ماوه‌ی سێ مانگی داهاتودا گرێبه‌سته‌که‌ ئیمزا ده‌کرێت و پرۆژه‌که‌ ده‌چێته‌ بواری جێبه‌جێکردنه‌وه‌. باسی له‌وه‌شکرد، که‌ پرۆژه‌که‌ بڕی 50 ملیار دۆلاری بۆ ته‌رخانکراوه‌و له‌رۆژی ئیمزاکردنی گرێبه‌سته‌کانه‌وه‌ بۆ ماوه‌ی دو ساڵی داهاتو ته‌واو ده‌کرێت. سه‌رۆکی ده‌سته‌ی وه‌به‌رهێنانی عێراق ئاشکراشیکرد: یه‌که‌کان به‌شێوه‌ی قیست ده‌درێت به‌هاوڵاتییان و سه‌ره‌تا 25% ده‌درێت و ئه‌وه‌ی دیکه‌ی بۆ ماوه‌ی 10 تاوه‌کو 15 ساڵ وه‌رده‌گیرێته‌وه‌.